一星期尖沙咀$40午餐大考驗 > Day 3 德發牛肉丸

Day 3 德發牛肉丸

唔知Bloomers有無發現我哋大廈旁邊有個隱世食堂呢??無錯!就係海防道臨時街市入面嘅熟食市場啦!!街市裡面有各種唔同嘅檔攤,賣花、肉檔、菜攤⋯⋯但只要Bloomers畀啲耐性繼續深入探究,就會發現內裡竟然埋藏咗好多間食店!!

講到海防道熟食市場,老饕們都總會聽過德發牛肉丸嘅大名。細細嘅店面、熱鬧嘅環境,細問下先知到原來小店已經有超過大半個世紀嘅歷史。經歷風風雨雨依然屹立不倒,佢哋嘅招牌牛肉丸Bloomers記得要試下啊!招牌牛丸、牛腩、牛雜、牛根,無論係單雙拼都只係要$30咋!仲可以自己選擇粉、麵或者米粉添!!

雙拼牛丸牛腩河粉

價錢: $30  🌟🌟🌟🌟🌟

味道:🌟🌟🌟🌟

湯底味道比較清淡,有淡淡腩汁味道。伴有兩片生菜葉,叫做有菜有肉,最抵讚嘅係佢哋貼心咁用湯匙裝住蔥花,如果唔鍾意食蔥嘅bloomer就可以好方便咁自己走蔥啦!!

牛丸爽口彈牙,一咬落去有少少肉汁唧出,牛肉味未算好濃郁但帶有淡淡嘅陳皮味,味道反而令人更加印象深刻。

最出彩嘅faner係佢哋啲牛腩!!腩肉肥瘦相間,炆得好夠腍身,咬落去五香料嘅香味吊出牛肉嘅香氣,滿嘴濃郁牛腩嘅甘香實在令人意想不到!!喺哩碗牛腩上可以品嚐到德發牛肉丸歷經歲月洗禮嘅手藝。

整體份量中等,因為雖然牛丸牛腩嘅份量足夠,但係河粉偏少,如果係男孩子們應該就會唔夠飽,不過佢哋係同旁邊香園共享餐檯,未夠飽嘅Bloomers可以選擇加份多士,都只係需要$11。

又或者可以返BLOOM歎杯Nespresso咖啡,仲有多款零食可以揀添!!

環境:🌟 🌟

畢竟係臨時街市裡面嘅熟食市場,環境自然係無一般餐廳咁乾淨企理啦。因為唔同店之間都會共享餐檯,所以食客通常都需要同其他人搭檯,環境比較殘舊,但檯面有抹過唔見有食物殘渣,都唔算邋遢。上菜速度超快!如果有興趣去食嘅Bloomers可以去快食一餐之後先上返BLOOM休息一下,再繼續繁忙嘅工作。

抵食:🌟 🌟 🌟 🌟🌟

雖然粉麵份量未算多,但係淨睇雙拼裡面有2粒彈牙牛丸同起碼5粒香糯牛腩,都只不過係 $30,真係超級抵食啊!

**5🌟為最高評分

地址:

尖沙咀海防道390號熟食檔
390 Haiphong Road, Tsim Sha Tsui

Shop B, G/F, Astoria Building, 24-38 Ashley Road, Tsim Sha Tsui

2018-02-07T12:54:08+00:00

Leave A Comment