一星期尖沙咀$40午餐大考驗 > Day 4 元朗學記粥麵專家

Day 4 元朗學記粥麵專家

可能大家都覺得food court都只有連鎖嗰幾間常見餐廳,但係只要耐心搵下就會留意到總有幾間你未試過嘅餐廳。

我哋樓下嘅大食代相信Bloomers都有幫襯過唔少,但係大家又有無諗過其實裡面都有唔少抵食之選呢?咁啱今日想食得清淡啲,又唔想行咁遠出去覓食,就走入去BLOOM樓下嘅大食代睇睇。

元朗學記粥麵專家,餐牌上有唔少粉麵都只係需要$30+,而粥品全部都係生滾砂鍋粥,都係$40左右,既然想食得清淡啲,索性就試下佢哋嘅生滾粥啦!

生滾砂鍋牛肉粥

價錢: $40 🌟🌟🌟
味道:🌟🌟🌟🌟🌟
估唔到哩一個粥竟然令人驚喜!粥底一早已經煲好,一落單師傅就即刻拎個砂鍋裝上熬好嘅粥底,加上調味過嘅鮮牛肉片,先用匙羹將粥底同牛肉攪拌均勻,之後整鍋粥放到電池爐上滾熱。等待不用十分鐘粥已經滾好,因為砂鍋有少許保溫作用,拎到餐檯上嘅時候啲粥仍然係噗嚕噗嚕滾個不停。

牛肉片份量唔少,而且片片都大塊,咬落去口感唔會好韌,微咸嘅牛肉亦唔會有嗰種落太多醃料嘅感覺。

粥裡面有少許薑絲同蔥段調味,辟去肉類嘅腥騷味,令整鍋粥味道提鮮。第一口品嚐粥,入口軟糯綿密,米粒經過長時間熬煮已經化為軟綿順滑嘅粥水,牛肉嘅味道令粥水更可口,只係少許鹹味反而吊出牛肉嘅鮮味,牛肉味與粥水融為一體,食落去全身都暖笠笠好舒服。

如果嫌單一個粥味道太過清淡,Bloombers可以喺取餐時自助加上胡椒粉、蔥花,或者炸蒜冬菜,令粥嘅味道更豐富。

❤️溫馨小提示❤️:Bloomers可以清清地咁食到一半先,再試下加入少量炸蒜冬菜撈勻,炸蒜嘅香氣同鹹香嘅冬菜會令鍋粥更有風味㗎!

環境:🌟 🌟 🌟
喺櫥窗外望入去,廚房都算乾淨企理。但由於喺大食代裡面,所以中午時間搵位需要啲時間同耐性。

抵食:🌟 🌟 🌟
雖然只不過係一鍋簡單嘅牛肉粥,但係以粥嘅味道,肉嘅份量同用生滾嘅方式出菜,都可以叫做物有所值!

**5🌟為最高評分
地址:
尖沙咀廣東道30號新港中心地庫大食代
Food Republic, Basement, Silvercord Tower, 30 Canton Road, Tsim Sha Tsui

2018-02-07T12:54:58+00:00