一星期尖沙咀$40午餐大考驗 > Day 5 星林居雲南米線餐廳

Day 5 星林居雲南米線餐廳

講起米線唔知Bloombers第一個諗起嘅係邊間餐廳呢?譚仔?三哥?抑或雲貴香?還記得學生時代,曾經紅極一時嘅星林居雲南米線餐廳嘛?佢哋嘅老闆曾授勳法國藍帶美食勳章,聽到都已經覺得好犀利,究竟時至今日嘅星林居味道又係點呢?

午飯時段甫入店內已經人滿為患,好在一個人嘅位置容易搵,毋需等位即可入坐。喺星林居盛名之下,店內有近7成都係遊客,當中又以韓國人為主。墟堪場面令多年未曾再嚐星林居嘅小編內心都充滿期待啊。

麻辣小鍋米線+魚腐、腩肉

價錢:$40 🌟🌟🌟
味道:🌟🌟🌟
唔知係咪盛名之下令人期待感高咗,食落口味道只可以算一般。叫咗個麻辣少少辣走酸嘅湯底,入口第一嘅感覺就係濃郁嘅甜,之後有輕微嘅辣味刺激味蕾,可惜甜味太重麻辣香氣欠奉。最令人難過嘅係明明寫住話少少辣或以上會有肉碎喺湯底內,但小編連肉末嘅影都見唔到,亦可能因為缺少肉碎而令湯底味道有所缺失。

自製腩肉切得比肥牛更薄,濃郁醬香令豬肉更有風味,味道甜甜咸咸,不錯!可惜唔知係咩原因,明明煮得好入味嘅半肥瘦腩肉,口感卻有啲嚡口,無嗰種長時間炆煮之後豬肉應有嘅鬆軟口感。
小編一直以為嗰種圓圓地皺皺地,咬落去軟軟地會好似豆卜咁會吸湯汁嘅係魚腐,亦意味魚腐只係得哩種型態。原來星林居嘅魚腐質感係類似黃金角咁,爽口彈牙,甜甜地有少少魚味,食落去更似係魚豆腐而非魚腐。

整體味道正正常常,只可以算係一碗普通米線,對小編嚟講味道一般,有啲名不副實嘅感覺。

環境:🌟🌟
店舖設計以黑色為主,牆身、檯凳、地板都係黑色,而且燈光偏暗,令人感覺唔夠明亮。由於生意好,店內人滿為患,每個座位之間間隔偏窄。最可惜嘅係餐檯上侍應姊姊只係收拾咗碗筷同用抹布輕輕一掃,檯面上仍有食物殘渣同下一位食客打招呼,所以環境分只可以遺憾地取得2🌟。

抵食:🌟🌟🌟🌟
$26一碗小鍋米線,內裡有酸菜、芽菜、韭菜,選擇辣味湯底可以附有肉碎,喜歡蔬菜嘅Bloomers更加可以要求多芽菜、多韭菜、多莞茜或者多蔥。再加兩款餸腩肉和魚腐都只需$40,選擇自由價錢相宜,抵食之選。

**5🌟為最高評分
地址:
尖沙咀樂道23號地下A舖
Shop A, G/F, No. 23 Lock Road, Tsim Sha Tsui

2018-02-07T13:00:42+00:00